21 Mar A escasa presenza de mulleres na dirección de festivais de cine en España
A realidade do panorama dos festivais de cine en España continúa a evidenciar unha importante fenda de xénero. O periodista Luis Martínez analiza no seguinte artigo de El Mundo esta situación.
Segundo os datos do Instituto do Cine (ICAA), dos 125 festivais que recibiron axuda, só 15 están dirixidos por mulleres. Se ampliamos a lista a certames máis pequenos, a cifra ascende a 43 dun total de 300, o que supón apenas o 14%.
A dirección dos festivais segue a ser un espazo dominado maioritariamente por homes. Mesmo en eventos que afirman apostar pola igualdade, a ausencia de mulleres en postos de responsabilidade segue sendo preocupante. A isto súmase o feito de que en moitos casos, os festivais que si teñen mulleres á fronte están centrados en temáticas de xénero ou LGTBIQ+, mentres que nos grandes certames a presenza feminina na dirección é anecdótica.
A inercia de veto e a falta de medidas efectivas que fomenten a paridade nestes postos reflicten unha tendencia xeneralizada en moitos sectores culturais. Como destacan diferentes profesionais do sector, non se trata só dunha cuestión de representación, senón de acceso ao poder e á xestión de recursos. A desigualdade estrutural leva a que moitas mulleres non consideren sequera a posibilidade de ocupar postos de dirección, algo que tamén se observa noutras disciplinas como a crítica cinematográfica, a dirección de fotografía ou a produción.
Neste contexto, é fundamental impulsar medidas concretas para promover a equidade na dirección de festivais, tanto a través de políticas de apoio do ICAA como de iniciativas colectivas que visibilicen e reforcen o traballo das mulleres no sector. Un paso cara a esta visibilización é a creación deste Excel de directoras de festivais de cine en España, un documento aberto ao que se pode contribuír para seguir recompilando información e promovendo unha maior igualdade no sector.
Desde Proxecta, sumámonos á reflexión e á necesidade de traballar para que a equidade de xénero nos festivais de cine sexa unha realidade e non só unha aspiración. O cambio cara a unha maior diversidade e representatividade é un obxectivo compartido que require accións concretas e compromisos firmes por parte de todas as institucións e profesionais do sector.