25 Xuñ Máis de 8.000 persoas participaron na última edición do (S8), Mostra Internacional de Cinema Periférico
A 16ª edición do (S8) reuniu en A Coruña a artistas, profesionais e público chegado de diferentes partes do mundo nunha semana dedicada ao cinema máis experimental.
O festival contou cunha ampla programación que incluíu máis de cen películas, estreas internacionais e actividades paralelas que espertaron un gran interese, enchendo salas como a Filmoteca de Galicia, a Sala (S8) de Palexco ou o patio da Fundación Luis Seoane. Entre o público destacaba unha importante presenza de persoas novas, así como creadoras e creadores de países como Italia, México, Portugal ou Alemaña.
Este ano o (S8) puxo especial atención nos vínculos co cinema latinoamericano, con retrospectivas e presentacións de autoras e autores como Carlos Castillo, Jeannette Muñoz ou Daniela Cugliandolo. A programación tamén contou coa presenza da estadounidense Betzy Bromberg, que participou activamente nas sesións e encontros do festival.
Ademais da exhibición, o festival reforzou espazos de formación e apoio á creación como as residencias BAICC ou o encontro INPUT, así como actividades de mediación cultural e inclusión, coa participación de escolares e colectivos sociais.
A programación pechouse cunha proxección itinerante por espazos da cidade vella da Coruña, dentro das sesións de Desbordamientos, que este ano incluíron pezas con proxeccións analóxicas, performance, fume e intervencións en directo.
Desde a organización do (S8) salientan o apoio das institucións, o traballo dos equipos técnicos e a implicación de público e participantes nunha edición que segue contribuíndo ao fortalecemento da escena cinematográfica contemporánea.