12 Xan Mares da Fin do Mundo pecha a súa VIII edición en Rianxo
A VIII Mostra Internacional de Cinema Documental Mares da Fin do Mundo celebrouse ao longo de cinco xornadas en Rianxo, consolidando a súa proposta como un espazo de encontro arredor do cinema documental, o pensamento crítico e a relación co mar, o territorio e a memoria colectiva. Esta edición marcou a primeira celebración da mostra nesta vila de fonda tradición cultural e mariñeira.
A programación combinou proxeccións cinematográficas, actividades paralelas e espazos de diálogo, cunha especial atención ao cinema da realidade, á recuperación de arquivos históricos e ás prácticas audiovisuais contemporáneas. As seccións Proa e Popa artellaron unha programación que puxo en relación obras actuais da vangarda documental con filmes históricos de referencia, reforzando o carácter reflexivo e formativo da mostra.
Xunto ás proxeccións, Mares da Fin do Mundo desenvolveu un completo programa de actividades paralelas, que incluíu mesas de debate, presentacións, accións performativas e obradoiros, fortalecendo a conexión entre o festival, a comunidade local e o seu contexto social e mariñeiro.
No marco da Competición Oficial, o xurado da VIII edición recoñeceu The Granny & Fishes, de María Mavati e Ehsan Farokhi Fard, co Premio á Mellor Película, mentres que Six Knots, de Ali Vanderkruyk, recibiu unha Mención Especial. O Premio do Público foi para Pie Dan Lo, de Kim Yip Tong, e o Premio do Público á Mellor Película Galega recaeu en Chelito, de Carlos Prado, dentro da nova sección creada nesta edición.
A VIII edición de MDFDM pechouse cunha asistencia dunhas 2.000 persoas, reflectindo o interese do público por unha proposta que combina cinema, reflexión e identidade.
A Mostra Internacional de Cinema Documental Mares da Fin do Mundo está organizada pola Asociación Cultural Mares da Fin do Mundo, coa colaboración na dirección e produción de ABA Films e o apoio da Deputación da Coruña, a Xunta de Galicia e o Concello de Rianxo, entre outras entidades. MDFDM forma parte de Proxecta (Coordinadora Galega de Festivais de Cinema), integrada na federación estatal Pantalla.